Meghalaya kohhran pahnihin Tourism Ministry pawisa hnawl

Meghalaya-a kohhran lian pahnih chuan an biak-in tihchangtlunna tur atana sorkar laipuiin pawisa pek a tum cheng vaibelchhe 70 an hnawl.

Catholic kohhran leh Maw­khar Presbyterian kohhrante chuan Union Tourism Minister KJ Alphonse-a'n January 8-a pawisa an dawn tur a sawi chu an hnawl dawn thu an sawi.

Cathedral of Mary Help of Christians (Catholic Church) Parish Pastoral Care-te'n Zir­tawpnia thuchhuah an siamah sorkar laipui aṭanga sum hmanga ṭanpuina lo kal tur chu an lak loh tur thu an sawi a, sorkar hnena pawisa an dil loh thu leh mi thilphal te leh mi rinawm te pawisa thawhkhawm hmanga hmingṭha mai an nih thu an thuchhuahah chuan an tarlang bawk.

Council Secretary Barnabas Nongbah chuan inthlan hmaa hetiang thil puan a ni chu ṭha an tih loh thu leh polictics huangchhunga kohhran hruai­luhna tur hmanrua a nih a hlauhawm thu a sawi. KJ Alphonse-a'n thuchhuah a siam hmain sorkar leh kohhran inbiakna a awm loh thu a sawi a, sorkar hotu lam pawhin an biak-in an la tlawh loh thu a sawi.

Mawkhar Presbyterian kohhran pawhin sorkar thutlukna chu an pawm loh thu sawiin, sum an hmuh tur pawh an lak dawn loh thu an sawi.

Union Tourism Minister KJ Alphonse chuan January 8 khan heng biak-in pahnihte tihchangtlun nan pawisa tam tham tak pek a nih tur thu a lo sawi tawh a, ‘Swadesh Darshan’ scheme hnuaia hmalak­na a nih thu sawiin Pathian biakna hmun 48-ah he scheme hnuaiah hian thlanchhuah a nih thu a sawi bawk.

Meghalaya Assembly inthlan hi February 27-ah neih a ni dawn a, March 3-ah vote chhiar a ni thung ang. Meghalaya-ah hian Assembly seat 60 a awm a ni.