AP CM in Pasighat Smart City lungphum phum, World War II Memorial Museum hawng bawk

Arunachal Pradesh Chief Minister Pema Khandu chuan Pathianni khan Pasighat smart city-a siamna tur lungphum chu IGJHS School playground-ah a phum a, hemi ni vek hian World War II Memorial Museum, Jai­ram­pur-ah a hawng nghal bawk.

Pasighat smart city project lungphum phumnaah hian Chief Minister chuan project kalpuina tur atan hian cheng vaibelchhe 1534 invest a nih thu a sawi a, hemi hmang hian Pasighat chu nasa taka tihchangtlun a nih tur thu a sawi. Electric leh tui hnianghnar taka hman tur a awm theih nan te, faina lamah leh inkalpawhna mai bakah IT connectivity leh mipuite himna lam thlengin nasa taka hmasawnna tur project a nih thu a sawi.

Pema Khandu chuan Arunachal mipuite chu smart city atan an khawpui pahnih ngawt mai pawmsak an nih avangin sorkar laipui lakah an lawm hle reng dawn niin a sawi. Pasighat leh Itanagar chu khaw te tak te mah ni se smart city atan thlan an nih avangin Prime Minster Narendra Modi lakah pawh a lawm thu a sawi.

Pasighat khua hi 1911-a din niin mi 25,000 vel an cheng a, smart city list tihchhuah hmasak ber khan telh a ni.

Pasighat bakah hian smart city a telh tur list tihchhuah thara khawpui pakua lek thlanchhuah zingah Itanagar pawh telh leh a ni bawk.

Pathianni vek hian Chief Minister hian Jairampur-a World War II Memorial Museum, cheng vaibelchhe 2.25 senga sak chu a hawng nghal bawk.

Museum hawn thar sakna pawisa hi Union Ministry of Culture sanction a ni a, PWD in a sak hna an thawk thung a ni.

Chief Minister Pema Khandu hian hawnna a neih zawh hian Indopui II hunlaia nunna chan ta te thlan a tlawh nghal a, thlan 833 vel helai hmunah hian a awm a ni. Museum-ah hian Tangsa Community hnam rohlu te pawh mipui hmuh theih tura dah a ni bawk a ni.

He hunah hian Education Minister Honchun Ngandam, State BJP President Tapir Gao, Parliamentary Secretary pathum Laisam Simai, Tesam Pongte leh Tage Taki bakah Kanubari MLA Gabriel Wangsu-te pawh an tel a ni.