Tripura sorkarin vaccine pek zat a tarlan HC-in a rintlak tawk lo niin a sawi

Tripura sorkarin an state chhunga puitling chin hnenah Covid vaccine a pek tawh zat a sawi chu a rintlak tawk lo niin Tripura High Court chuan a sawi a, state sorkar chuan sawifiah turin a hrilh nghal bawk.

State sorkar chuan an state chhunga vaccine la thei chin, kum 18 chung lam hnenah vacine dose khatna hi 80% in an la tawh tih sawiin, kum 45 chunglamah chuan vaccine la hi 98% an tling tawh niin a sawi a ni. Hemi chungchang hi tualchhung chanchinbu pahnih, Tripura Observer leh Northeast Colour chuan June 25 khan tichhuakin, National Health Mission, Tripura-a mission director Dr Siddarth Shiv Jaiswal-a thusawi an tarlang a ni. Mahse court division bench chuan eng kawng zawng mahin vaccine pek chhuah tawh zat nia sawi hi a dik thei lo niin a sawi.

Court chuan, "Sorkar affidavit aṭanga a lan danin, state pumah kum 18 chunglam hi mi nuai 26.86 vel an awm a, heng aṭang hian kum 45 chunglam chu nuai 12.36 vel an ni. Mission Director-in vaccine pek zat a sawi lai hian, state chhunga vaccine pek tawh chu dose 24,26,803 niin, heng zinga 5,66,458 chu a dose hnihna pek an ni," a ti. Kum 45 chunglam zingah vaccine pek hi nuai 9 vel awmin, hei hi 98% a tling lo tih a sawi bawk.