AP-in vaccine la chauh luh phal

Arunachal Pradesh sorkar chuan state pawn atangin covid vaccine la chauh luh a phal dawn.

State sorkar chuan an state-ah kum 18 chunglam zingah vaccine la 68% an awm tawh tih a sawi bawk.

Chief secretary Naresh Kumar chuan union home secretary Ajay Kumar hoa online meeting an neihah, an state-ah vaccine la chauh luh/zin an remtih tur thu hi a sawi a ni.

Kumar chuan state chhungah hri darh zel tur venna atan theihtawp an chhuah mek tih sawiin, vaccine pawh a theih anga chaka pekchhuah mek a ni, a ti. "Kum 18 chunglamte vaccine pe kim tur chuan vaccine dose nuai thum vel mamawh belh a la ni," tiin Union Secretary hi a hrilh nghal bawk.

State chhung hmun ṭhenkhatah vaccine la duh lo/hreh an awm avangin official-te chuan a la thei chinten vaccine an lak kim vek theih nan kawng hrang hrangin hma an la mek. Lower Subansiri district-ah chuan kum 45 chunglam, vaccine late chu a thlawnin buhfai kg 20 pek an ni.