Bawng ekin Covid a tidam thei lo tih sawitu Journalist leh activist thla 2 tang tawh

Manipur sorkar chuan National Security Act hnuaiah bawng ek leh zunin Covid-19 a tidam thei lo tih sawitu, activist Erendro Leichombam chu thla hnih lung-inah a tan tir tawh.

2012 Harvard Kennedy School graduate, Erendro Leichombam leh Imphal-a journalist Kishorechandra Wangkhem te chu Facebook-a Covid damdawi chungchang an comment avangin May thla khan man an ni a, tun thlengin Sajjwa jail-ah an la tang a ni.

Leichombam leh Wangkham-te hian Manipur state BJP president, covid vanga thi S.Tikendra Singh chungchang post-naah, Singh-a party member-te chuan bawng ek leh zun chu virus damdawi angin sawi mah se, he hri laka min chhan thei tur chu science leh common sense a ni, tiin an sawi a ni. An comment hi state BJP general secetary P.Premachanda Meetei leh party vice president Usham Deban-te chuan police ah complaint-in, May 13 khan an pahnih hian an chenna in atangin an man zui nghal a ni.

May 17 khan Imphal local court chuan bail-in a chhuah a, mahse advocate Victor Chongtham chuan police kut atanga an chhuahna tur paper te peihfel a nih hmain, state sorkar chuan NSA hnuaia thubuai a siamsak zui nghal a, hei vang hian hren zui leh nghal an ni tih a sawi.