Assam cow protection bill-in a nghawng chuan Meghalaya-in sorkar laipui sawipui dawn

Meghalaya chief minister Conrad K Sangma chuan Assam sorkarin bawng hum­halhna dan siam a tum chuan, Meghalaya-a bawng lakluhna lam a nghawng tel dawn chuan an inrawlh dawn tih a sawi. A tul chuan Assam sorkar leh sorkar laipui pawh a sawipui tur thu a tarlang.

CM Sangma chuan, " Assam-in a pass a, a taka a hman hunah he dan hi kan lo enfiah dawn a ni. Eng angin nge kalpui a tum tihte pawh kan lo en dawn a ni. Bill-a an tarlan dan kimchang kan hriat loh avangin lo sawi lawk vak chu a dik ber chuang lo," a ti. Mahse Meghalaya nghawng thei thil a nih chuan an buaipui zui nghal dawn tih a sawi.

Assam-a bawng hum­halhna tur bill siam hi vawiin atanga neih tan tur, assembly budget session ah pharh a ni dawn. Chief minister Himanta Biswa Sarma chuan an dan siam thar turin a tum ber chu sumdawnna thila ramchhung hmun dang aṭanga Assam-a bawng lakluh leh Assam aṭanga lakchhuah vek a ni tih a sawi. Bill hi pass a nih chuan an dan hman mek, The Assam Cattle Preservation Act,1950 a thlak ang. Tuna an dan hman mek hnuaiah chuan bawngsa ei khap a ni lo a, bawng pawh local veterinary officer te remtihnain kum 14 chin chu talh phal a ni bawk.