NSCN-IM-te'n Nagaland Assembly Inthlan tur duh lo

Naga hel pawl National Socialist Council of Nagaland - Isak Muivah (NSCN-IM) chuan February-a Nagaland assembly inthlan neih tur chu an duh lo thu sawiin, sorkar laipui nena remna zawnga inbiakna kal mek chu a tihṭhuanawp tur thu an tarlang.

NSCN-IM chuan an thu­chhuah tarlanah Naga political issue buaina chinfel a nih ṭep tawh laia inthlan neih chu an pawm theih loh thu sawiin, Naga mipui tan buaina chinfel a nih ṭep tawh laia inthlanna neih chu thil pawm theih a ni lo a ni, an ti.

Hemi a nih avang hian inthlan kaltlangpui tura hmala tu te chuan Naga mipuite duhdan an ngaipawimawh lo ni a sawiin, mimal emaw pawl pawh nise inthlan neih anih theih nana hmalatu te chuan remna tluantling zawnna kawngah hma an la lo niin an sawi bawk.

Member 60 awmna Nagaland assembly inthlan hi February 27-a neih tura ruahmanna siam a ni.

NSCN-IM chuan sorkar laipui leh Election Commission of India in thlathara inthlanna neih tura ruahmanna an siam chuan sorkar laipui nena inremna zawnga an inbiakna chu a tibuai dawn niin an sawi a, buaina pawh hma takin an chingfel thei dawn lo niin an sawi.

Naga hel pawl thuchhuah chuan buaina rang thei ang bera chinfel a nih theih nan sorkar laipui chuan political will a hman a ngai a ni tiin remna zawng tura ke a pen a ngaih thu an sawi bawk.

An thuchhuah chuan buaina an chinfel ṭep tawh thu tarlangin sorkar laipui hmalak tawhna pawh lawmawm an tih thu an sawi a, military solution ni lo a political solution an zawn zawk avangin lawmawm an tih thu an sawi.

NSCN-IM leh sorkar laipui hian remna zawnga inbiakna hi 1997 aṭang khan an lo nei tawh a, vawi tamtak inbiakna an nei tawh a ni.

NSCN-IM thuchhuah chuan kum nga zet inbiakna an neih tawh hnuah 2002 khan India sorkar chuan Naga-te dinhmun leh history chu a pawmpui thu an tarlang a, August 3, 2015-a framework agreement an ziah chungchang pawh sawiin he inremna an ziah lai hian Prime Minister Narendra Modi pawh a awm thu an tarlang.

2015-a framework agreement an ziah hnuah hi chuan buaina hi chinfel vat a nih an beisei a, hetianga inbiakna kalpui laia inthlan buatsaih a ni tur chu an duh loh thu an sawi a ni.

India in inde­pendence a chan hnu lawk aṭang khan Naga politics buaina hi chhuakin thisen tamtak a chhuak tawh nghe nghe a, 1997-a sorkar laipui leh NSNC-te'n inkahhai an puan aṭang khan inbiakna hi kalpui ṭan niin 2015 khan framework agreement hi an ziak ta a ni.

Naga hel pawlte hian Arunachal Pradesh, Assam leh Manipur-a Naga mite chenna chu an state china rin luha Nagalim (Grea­ter Nagaland) siam an ngiat a, hemi a nih avang hian frame­work agreement ziah a nih leh tunthlenga a chhung thu la tlangzarh a nih loh avang hian an ṭhenawm state-te hian an ram chin hloh mai an hlauhthawh avangin nasa takin an lo sawisel fo tawh bawk.

Nikum December thlatira Hornbill hawnnaah khan Presi­dent Ram Nath Kovind chuan buaina chinfel tumna hi a hmar bawk ṭep a nih tawh thu a lo sawi tawh bawk a ni.

Hetiang a nih laia inthlanna neih tum a ni hi Naga mi tamtak chuan an duh lo hle a, Pressure group hrang hrang pawhin inthlan hi ṭulh rih a nih theih nan Prime Minister hnenah pawh memorandum an lo thehlut nual tawh.

Dodalna nasa hle mah se kar kalta Ningani khan ECI chuan thuchhuah siamin seat 60 awmna Nagaland assembly inthlan chu February 27-a neih a nih tur thu leh March 3-ah vote chhiar a nih tur thu an tarlang ta tho a ni.