Assam CM in Saubhagya scheme a tlangzarh

Assam Chief Minister Sarbanada Sonowal chuan Thawhlehni khan Saubhagya (Pradhan Mantri Sahaj Bijli Har Ghar Yojna) scheme hawnna hun neiin Assam pumpui electric hmanga thlunzawm tur chu a takin a chang tawh dawn niin a sawi a, hmun kilkhawr bera awm te pawhin electric an neih tawh dawn thu a sawi.

Sarbanada Sonowal chuan thingtlang kilkhawr ber pawh electric hian a thlen vek tawh dawn thu a sawi a, tunlai khawvelah hi chuan electric hi mitin mamawh pawimawh ber te zinga mi a nih tawh thu a sawi. Saubhagya scheme hi mitin in electric an hman theihna tur scheme a ni tih a sawi bawk.

Sonowal chuan Prime Minister Narendra Modi-a'n September 25, 2017-a a tlangzarh Saubhagya scheme hmang hian December 31, 2018-ah chuan mi zawng zawngin electric an hman tawh dawn thu a sawi. Tuna electric in a la pawh loh thingtlang khua nuai 20.40-te pawhin electric hi an la nei vek dawn niin a sawi.

Chief Minister chuan electric hrui hmanga an pawh theih lo khua leh in te pawhin solar power pack an dawng vek dawn niin a sawi a, LED light, fan leh power plug an dawng tel vek dawn bawk niin a sawi. Heng an bungraw dawn te hi kum nga chhung maintenance support a thlawnin an pe dawn niin a sawi bawk.

CM hian Sanjog’ mobile app pawh a tlangzarh nghal a, power connection ti thar duh tan he app hmang hian a buaipui theih dawn a ni.