Assam : Dima Hasao-a Police silai hmeh puahah 9 hliam

Assam Dima Hasao distrcit-a Maibong Railway Station-ah Ningani-a mipui pungkhawm hnawhdarh nana police-te silai hmehpuahin mi pakua a hliam a, heng zinga pahnih phei hi chu an dinhmun a ṭha lo hle.

Sorkar laipuiin he district-a Naga mite tana satellite council siam a tum nia an thu dawn duh lohna lantir nana pungkhawm mipuite hian darkar 12 chhung “Dima Hasao Bandh”huaihawt an tum a ni. Sorkar laipui leh NCN-IM-te'n remna zawnga an inbiakna bawhzuina ni ngeia ngaiin mipui pungkhawm hian station hi dangin Silchar-Guwahati passenger phur rel tlan tur an dang bawk. Station an dan avang hian passenger 3,000 vel an tang a ni.

Assam Director General of Police Mukesh Sahay chuan police silai hmehpuah avang hian mi pakua in hliam an tawrh thu leh, heng zinga pahnih dinhmun hi a ṭhat loh thu a sawi a, police te hian mipui hnawhdarh nan hian tear gas-te pawh hmang mah se mipui thinrim sosang zel hian railway station hi lungin an vawm thu a sawi bawk.

Sahay chuan police leh senior district official ṭhenkhat pawhin hliam an tawrh thu a sawi a, mipui pungkhawm hian motor pahnih an tichhe bawk niin a sawi.

Mipui tangkhang te hi an sahimna tura school-a khung­khawm an nih thu sawiin, an kalna tur ṭheuh an thlen theih nana hmalak an tum thu a sawi bawk.

Police-te chuan lungawi lohna lantir ute hian rel kawng pawh an tihchhiat an rin thu an sawi bawk a ni.