Nagaland-ah Model Code of Conduct hmang ṭan
Nagaland Chief Electoral Officer Abhijit Sinha chuan Nilaini khan thuchhuah siamin January 18 atang khan Model Code of Conduct chu state chhungah hman a nih tawh thu a sawi.
He Code of Conduct hnuaiah hian Election Commission on the Model Code of Conduct, electoral offence and election expenditure monitoring team-te chuan uluk takin campaign kalpui dan an enfiah mek a ni.
He dan hnuaiah hian candidate chuanna motor in sum fai cheng 50,000 aia tam a phurh chuan, a agent emaw party worker emaw chu man tur an ni a, hemi bakah hian poster, election material emaw dawmdawi, zu, ralthuam leh thilpek emaw pawh nise cheng 10,000 man hu aia tam a nih chuan man tur a ni bawk.
Bank lam pawhin pawisa lachhuakah rinhlelh deuh an neih chuan district election officer hnenah an report tur a ni a, hemi bakah hian miin cheng 50,000 aia tam a ken chuan a ken chhan document fel tak a nei tur a ni tiin Sinha chuan a sawi.
Inthlan hma chuan sorkar scheme thar emaw project thar tur chungchang puanchhuah phal a ni lo a, pawmpui tawh an nih pawhin hma lak phal a nih hrih loh thu CEO chuan a sawi.
Sorkar rest house, bangla leh guest house dang te pawh politics kaihhnawiha hman phal a ni tawh hrih lo a, phalna nei lo political advertisement pawh siam phal a ni lo bawk.
Official motorte chu party thilah emaw campaign nan emaw hman khap a ni bawk a, thamna lak pawh khap a ni bawk.
Nagaland Assembly member seat 60 awmna hi February 27 hian an inthlang dawn a, March 3-ah vote chhiar a ni dawn a ni.
Hetih lai hian pressure group hrang hrang leh hel pawl NSCN-IM-te pawhin NSCN-IM leh sorkar laipuiin remna zawnga inbiakna an kalpui mek tiṭhuanawp theia ngaiin inthlan tur hi an duh loh thu an lo sawi ve bawk a ni.