Covid-19 positive rate sanna district-te Drone hmanga vil turin Assam CM-in hrilh

Assam chief minister Himanta Biswa Sarma chuan Covid-19 positive rate sanna district pakuaah hri laka invenna tura kaihhruaina siamte zawm ṭha lote enfiahna atan drone hmang turin official-te a hrilh.

CM Sarma chuan senior officer-te chu thingtlang khaw hrang hrangah kal a, Covid-19 hri chungchangah mipuite zirtirna pe turte, kaihhruaina leh khuahkhirhna siamte zawm ṭha turtea hrilh turin a ti bawk a ni.

Pathianni khan CM hian positive rate sanna district pakua - Biswanath, Dibrugarh, Golaghat, Jorhat, Kamrup (Metro), Lakhimpur, Nagaon, Sonitpur leh Sivasagar-a DC, SZP leh health official-te chu video conference hmangin an district dinhmunte a sawipui a ni. Sarma chuan district thuneitute hnenah mipui punkhawmna ṭhin hmunte enfiah a, khuahkhirhna khauh taka kengkawh reng turin a chah.

Heng district pakua zinga Diburgarh leh Nagaon district-ah chuan chawhnu dar 2 aṭanga a tuk zing dar 5 thleng curfew puan a ni a, Kamrup (M)-ah tlai dar 5 aṭanga a tuk zing dar 5 thleng curfew puan a ni bawk. District dangah chuan total containment puan a ni.

Chief Minister chuan district border-te pawh vil reng tura chahin, khuahkhirhna hman a nih chhung chuan district inkalpawh khap reng turin a ti. Hei bakah hian a tam thei anga vaccine pek chhuah chu kalpui reng turin a ti bawk.

Hri vanga pasal chante chhawmdawlna tur siam
Chief minister Sarma chuan Pathianni khan Covid-19 hri vanga an pasalte chan, hmeithaite chhawmdawlna pekna tur, 'Chief Minister's Covid-19 Widows Support Schme' chu a hawng bawk.

He scheme hnuaiah hian hripui vanga pasal chan, an chhungkaw kumkhat sum lakluh cheng nuai nga aia tlemte chu chhawmdawlna, cheng nuai 2.5 ṭheuh pek an ni ang. Chhawmdawlna dawng thei tur finfiah tawh hi mi 873 an awm tawh.

Scheme hawn ni hian district pariat-a hmeithai 176 hnenah chhawmdawlna hi pek nghal a ni.

CM chuan he scheme hnuaia chhawmdawlna dawng thei tur hriat tawh hi mi 873 ni mah se, enfiah chhunzawm zel a la ni a, mi 2,000-2,500 vel an tlin a rin thu a sawi. "Hetiang programme siam a ngai hi kan tan pawh thil hlimawm tak a ni lo, mahse chhawmdawlna kan pe thei hi kan inchhuang hle a ni," a ti. Assam sorkar hian a hmain hripui vanga nu leh pa chan, fahrahte chhawmdawlna tur pawh a lo siam tawh bawk.