Gadkari-a'n Manipur-ah highway project 16 lungphum a phum

Union road transport and highways minister Nitin Gadkari chuan Thawhṭanni khan cheng vaibelchhe 4,148 senga siam tur, Manipur-ah national highway project 16 lungphum a phum.

Road ministry thuchhuah chuan heng kawngpuite hian Manipur leh state dang inkalpawhna ṭha leh changtlung zawk siamin, hei hian agriculture, industrial leh socio-economic lamah hmasawnna a thlen dawn a ni, a ti. Heng project hmang hian tualchhung mite tan hnathawh tur tam tak a siamsak dawn tih a tarlang bawk. National highway project 16 hnuaiah hian kawngpui, km 298-a thui siam a ni ang.

Union minister chuan Manipur tan hian project, cheng vaibelchhe 5,000 hu vel chu ruahman a ni bawk tih sawiin, detailed project report (DPR) chu thla ruk chhunga peihfelin, kum khat chhungin hna pawh ṭan nghal a nih tur thu a sawi.

Gadkari chuan state chhunga kawngpui zauhna turin Bharatmala Phase ll Pariyojana hnuaiah rawtna thehluh a nih tur thu a sawi bawk a ni. Prime minister Narendra Modi chuan hmarchhak bial chu a dah pawimawh hle tih sawiin, kawngpui ṭha siam chuan Manipur tan kawng hrang hrangin hmasawnna a thlen thei dawn a ni, a ti. Industry tihhmasawnna tur te, hna tam zawk siamna leh retheihna umbona tur chuan tui, power, transport leh communicaton-te chu thil pawimawh a nih thu a sawi bawk.

Hemi rual hian Manipur-a national developmental project thawh mekah hna thawh dan chu a lungawi thlak loh tih Gadkari chuan a sawi a, mi rinawm, dik taka hna thawk a, a hun taka zo ṭhinte chu an mi mamawh a nih thu a sawi. Hnathawhna kawngah harsatna awm ṭhin mah se, hruaitute chuan harsatna chin fel dan leh chak zawka hnathawh a nih theih dan tur chu an ngaihtuah ṭhin a ngai a ni, a ti.