Raijor Dal-in MFI Act hman an phût

Assam-a eptu pawl, Raijor Dal chuan state chhunga hmeichhe tam takte hnena puih theihna tur, Assam Micro Finance Institutions (Regulation of Money Lending) Act, 2021 chu hmang turin sorkar an phût.

Assam assembly budget session hi Thawhṭanni aṭang khan neih ṭan a ni.

Raijor Dal chuan hripui leng vanga lockdown puan a nih fo avangin mi tam takin ei leh bar zawnna kawngah harsatna an tawk mek a, microfinance institutions (MFI) aṭanga loan an pukte rulhna turin an kal (kidney) hralhte an awm hial nia report-te a awm tih an sawi. Hei vang hian harsatna tawk mekte chhawmdawlna turin he dan hi hman thuai a ṭul a ni, an ti.

Pathianni khan Morigaon district-a kal hmanga sumdawnna hmun chu dap chhuah niin, he thila inhnamhnawih mi pahnih man an ni bawk.

Guwahati-a press conference a neihah, Raijor Dal vice president Russel Hussain chuan, "Morigaon-a thil thleng hian mipuite dinhmun a tilang a ni. Mi tam tak chu an fate enkawlna tur te, MFI loan rulhna turte sum an neih loh avangin an kal an hralh a ngai hial a, hei vang hian kal hmanga sumdawnna pawh a rawn hluar chho leh a ni," a ti.

Hri leng leh lockdown chuan mipuite phurrit nasa tak siam belhin, BJP chuan inthlan neih dawna a lo tiam tawh angin MFI aṭanga loan late chu a ngaidam vek tur a ni, tiin eptu party chuan a sawi.MFI Act hi hman a nih chuan, sum puktute hian an chhawr thei a ni tih an sawi.

Kum 2020, December 30 khan Assam Assembly-ah bill hi pass a lo ni tawh a, kumin January 27 khan Governor pawhin pawmin a hming a sign hnan tawh a, mahse tun thlengin he dan hi sorkar chuan a la hmang lo a ni.