Sorkar hna laknaa kum bithliah tihsan phût
Hynniewtrep Integrated Territorial Organization (HITO) chuan Meghalaya chief minister Conrad K Sangma hnenah sorkar hna thawk tur laknaa kum bithliah chin, upper age limit chu tisang turin an ngen.
Tuna dan hman mekah chuan SC/ST candidate tan sorkar hna dilnaa upper age limit chu kum 32 a ni a, hei hi siam ṭhaa kum 42 chinah bithliah turin HITO hian an ngen a ni.
HITO president Donbok Dkhar chuan Covid-19 hri leng vanga academic session leh competition exam-te a bahhlah avangin, candidate tam tak tan harsatna a thlen tih sawiin, hei vang hian hna dil duh, ṭhalaite hmakhua ngaiin he ngenna hi an thlen tih a sawi. CM pawhin an ngenna hi ṭha taka a lo dawnsawn thu leh, official-te nen an sawiho tur thu a lo hrilh tih a sawi bawk. "CM chuan upper age limit hi kum 42-ah tihsan theih a ni dawn lo a, mahse kum 37 chinah lo tih a tum dawn tih a sawi a ni," a ti.
An ngenna ngaihtuah turin HITO hian state sorkar hi thla khat hun an pe a, hemi chhunga ngaihtuah a nih loh chuan state chhunga ṭhalaite chu chak zawka hma la tura an nawr tur thu an sawi.