CCNTCHOC-in Nagaland inthlan hun sawn turin EC ngen

Core Committee of Nagaland Tribal Hohos and Civil Orga­nisations (CCNTCHOC) chuan Inrinni khan Election Commission (EC) hnenah lehkha thawnin, February 27-a state assembly inthlan neih tura ruahmanna awm chu Naga political issue chinfel a nih hma chu ṭhulh rih turin an ngen.

Core Committe in Chief Election Commissioner O. P. Rawat hnena lehkha an thawnah Naga political issue buaina chu chinfel a nih ṭep tawh thu leh tun anga inbiakna neihin dinhmun ṭha a chhuah hi a la awm ngai loh thu an ziak a, hei vang hian inbiakna kallai hi eng vang pawh ni se tihbuai loh ni thei se an duh thu an ziak a ni.

An lehkha thawnah hian Prime Minister Narendra Modi pawhin Naga buaina chinfel chu a ngaihpawimawh thu an ziak a, inbiakna chu a hmawr an bawk ṭep tawh thu an ziak bawk.

Naga hel pawl National Socialist Council of Nagaland-Muivah (Issac-Muivah) leh sorkar laipuiin August 3, 2015-a Framework Agreement an ziah hnua inremna siam tura hmalakna kal mek chu tihṭhuan­awp an hlauh thu an tarlang a ni. NSCN-IM lam pawh hian kar kalta khan February 27-a inthlanna neih tur chuan inremna zawnga inbiakna kal mek chu a tihṭhuanawp an hlauh thu an lo tarlang tawh a ni.

Core Committee chuan dan pangngai anga inthlan hun siam chu constitutional amendment leh Election Commission-te thuneihna hmanga awlsam tea tihdanglam a nih theih thu an ziak bawk.

Hetih lai hian Nagaland Chief Minister TR Zeliang pawhin political party dang zawng zawngin nomination file lo tura thutlukna an siam a nih chuan an party Naga People's Party (NPF) pawhin Naga mi-te chu an phatsan dawn bik loh thu sawiin, nomination an file bik dawn loh thu a sawi a ni.

Zeliang chuan Nagaland-a remna leh muanna a awm chu a duh ber a nih thu a sawi. "Inthlan chungchangah leh buaina chinfel chungchanga ka thusawi avangin hruaitu ṭhenkhatin Anti-India tiin min sawi tih ka hria. Mahse Naga political issue chinfel na in Nagaland thar leh ṭha zawk a siam dawn a nih chuan pawi ka ti lo", tiin Zeliang chuan a sawi a ni.