Meghalaya Congress in candidate list tichhuak Sangma seat hnihah ding dawn

Congress party chuan Inrinni khan seat 60 awmna Meghalaya Assembly inthlan neih tura an party aiawha ding tur list an tichhuak a, hming 57 tarlang in hetah hian Chief Minister Mukul Sangma hming pawh a tel.

Heng candidate list hi New Delhi-ah tarchhuah niin Oscar Fernandes kaihhruai Congress Screening Commitee in thutlukna an siam hnuah tarchhuah a ni a, list-ah hian state Congress President Celestine Lyngdoh leh Congress Lok Sabha member Vincent H. Pala pawh an tel a ni.

Hetih lai hian assembly con­stituency pathum - Pyntho­rumkhrah, South Shillong leh Khliehriat-a ding turah erawh thutlukna an la siam theih loh thu sawiin Vincent H. Pala chuan heng constituency-ah hian din tum an tam avanga thutlukna la siam lo an nih thu a sawi.

1993 aṭanga Ampatigiri constituency-a vawi nga lai a zawna hnehna lo chang tawh Chief Minister Mukul Sangma chu Garo hills-a Ampatigiri leh Songsak constituency-ah te a ding dawn a ni.

List tarchhuah zingah hian hmeichhia panga an tel a, State congress president Celestine Lyngdoh chuan hnehna chan ngei an in beisei thu a sawi.

Lyngdoh chuan seat 30-ah tal hnehna chan an tum thu sawiin, result puan a nih hunah chuan seat 31 aia tamah pawh hnehna kan chang maithei a ni, a ti.

Congress hi an party legislator pasarih in nikum kum chawhnu lam aṭang khan an chhuahsan a, heng zinga panga hian National People's Party zawm in, pakhat in BJP a zawm a, pakhat erawh chuan party thar People's Democratic Party a zawm thung a ni.

Meghalaya Assembly inthlan hi February 27 hian neih a ni dawn a, March 3-ah vote chhiar a ni ang. Tuna Assembly term dinglai mek hi March 6-ah khian a tawp tawh dawn bawk.