Manipur BJP MLA bomb hmangin bei, thi leh hliam awm lo

Manipur BJP MLA Hei­kham Dingo-a chenna ina boundary wall bulah bomb tihpuah a nih thu police official-te chuan sawiin thi leh hliam erawh an awm lo niin an sawi.

Dingo-a hi Imphal-a a chenna in boundary wall bulah Inrinni zan khan bomb hmang hian thah tum a ni a, vanneih thlak takin thah tumna hi a pumpelh hlauh a ni.

Police leh paramilitary force-te chuan Dingo-a in hi rang takin thleng mah se tumah man emaw rinhlelh emaw an neih loh thu an sawi.

Security force-te hian Sek­mai assembly constituency MLA in hi an hual nghal a, Superintendent of Police Them­thing Ngasangva hoin pawikhawih­tu zawn hna beihpui an thlak nghal a ni.

Police-te chuan remote control bomb hmanga beih a nih thu an sawi a, hetih lai hian eng pawl mahin an tih a nih thu an la sawi lo.

Inrinni zan tho hian Manipur police-te chuan Hindustan Construction Co Ltd. employee pahnih chu hel kut aṭangin an chhanchhuah thu an sawi.

Heng an mi chhanchhuah te hi ralthuam keng hel ten January 18 khan an ru bo a ni. Inspector General of Police L. Kailun chuan hel ten an mi rukbo chhanchhuak tura beihpui an thlaknaah hian KNF-MC mi pahnih an man thu sawiin heng an mi man te hian an mi ruk bo te an dahna hi an hrilh niin a sawi a ni.