Guwahati Airport Terminal thar tur lungphum phum

Union Civil Avia­tion Minister P. Ashok Gajapathi Raju chuan Pathianni khan Guwa­hati-a Lokpriya Gopinath Bordoloi International Airport-a Terminal thar tur lungphum phumna hun a hmang.

Terminal building thar tur siamna atan hian cheng vaibelchhe 1, 232 ruahman a ni a, check-in counter 63, self check-in kioks 20, immigration counter pariat, customs counter pariat, arrival carousels paruk, escalator 10, elevator 25, self-baggage drop counters 16 leh aircraft parking bay 20 awm tura ruahmanna siam a ni bawk.

Terminal thar tur hi sqm 90, 000 a zua tur niin building chhungah hian bungraw changkang ber ber dah a ni dawn a, mi tam lai berin mipui 3,100 vel dawl zo tura ruahman a ni bawk.

Raju chuan hetianga hmasawnna a awm theih chhan hi Prime Minister Narendra Modi leh Chief Minister Sarbanada Sonowal-te hmalakna vang a nih thu a sawi a, aviation (sector)-ah khawvela ṭhang nasa ber leh domestic traffic-ah khawvela hmasawn ber pathumna kan ni, a ti.

Union Minister chuan NDA in sorkarna an chan hma khan commercial flight hman theihna airport 73 chiah a awm thu leh, kumthum leh a chanve chhunga airport 18 commercial flight hman theih tura an buat­saih hman thu a sawi bawk.

Raju chuan economic hmasawnna a awm theih­na tur chuan tran­sportation leh connec­tivity a pawi­mawh thu sawiin, Assam sorkar pawhin helam kawngah hian nasa taka hma a lak thu a sawi a, Act East policy hmanga hma­sawnna chu hmarchhakah thlen a nih dawn thu a sawi bawk a ni.