Naga hel pawl zingah inthlan tur duh lo an tam

Naga hel pawl hrang hrang-te chuan Pathianni khan Nagaland Assembly inthlana din tum te chu vau in, tel lo tura an duh thu an sawi a, inthlana an tel chuan remna zawnga inbiakna kal mek an tikhawlo vek dawn niin an sawi.

Naga tribal pawl hrang hrangte chuan political party-te leh independent-a din tum te chu ding lo tura ngenin, kum tam tak buaina chinfel theih loh Naga political issue chinfelna kawng tibuai lo turin an ngen. Heng zingah hian Naga pawl lian pahnih Naga Mother’s Association leh Naga Student Federation-te pawh an tel.

Naga hel pawl hrang hrangin joint statement an tihchhuahah Naga mipuiin lungrual taka inthlan neih a nih lohna tura thutlukna an siam a nih chuan awmzia a nei dawn hle nia sawiin, inthlana din tum te chu ṭhulh tura an ngen thu an tarlang a ni.

He thuchhuah hi National Socialist Council of Nagalim-Issac Muivah’s (NSCN-IM) leh Core Committee of Naga­land Tribal Hoho and Civil Organisations (CCNTCHOC)-te'n thuchhuah an siam hnuah an siam ve leh a ni.

NSCN-IM leh CCNTCHOC-te chuan inthlan tur hi an duh loh thu thuchhuah an lo siam ve tawh bawk.

Hetih lai hian Inrinni khan Nagaland political party hrang hrang te chuan tribal pawl Naga Hoho-te thuchhuah, Nagaland inthlan hma ngeia buaina chinfel an duh thu an sawi chu an thlawp thu an tarlang. Heng thlawptu party zingah hian Nagaland-a rorellai NPF pawh an tel.

The Naga People’s Front (NPF), National People’s Party (NPP) leh Aam Admi Party (AAP)-te chuan CCNTCHOC thutlukna chu an pawmpui thu an sawi.

Heng party hrang hrang meeting neihah hian MLA pali nei, BJP-te chu an tel ve lo thung a, hetih lai hian tribal pawlte hian BJP pawh hi an thuchhuah thlawp tura an ngen dawn thu an sawi a ni.

Tribal pawl te hian February 27-a inthlanna neih tur hi an duh loh thu sawiin inthlan hma ngeia Naga buaina chu chinfel an duh tih an sawi a ni.

Party dang Hoho thlawptu te hian Hoho pawl chu BJP-te inthlana tel lo tura thutlukna siam tir hmasa turin an ngen thung a, hei hi a chhan chu 1998-a thil thleng ang kha a thlen nawn leh an hlauh vang a nih thu an sawi. 1998 khan Naga Hoho-te hian inthlan hi an lo boycott tawh a, mahse khatih laia rorel lai Congress-te chuan inthlan dawn ṭepah nomination file leh thutin seat 60 awma seat 59-ah hnehna an chan phah a ni.

NPP vice-president Katoho Sukhalu chuan NPP-te chuan Naga mipuite duhdan anga buaina chinfel hmasak an duh thu a sawi.

Chief Minister TR Zeliang pawhin party dangin nomination an file dawn loh chuan NPF pawhin an file dawn bik loh thu leh, Naga mipuite duhdan an ngaih pawimawh ber thu a lo sawi ve tawh bawk a ni.