BJP-te'n Tripura-a an candidate tur list hmasa ber tichhuak

Bharata Janata Party (BJP) chuan Inrinni khan Tripura Assembly inthlan huna an candidate tur list hmasa ber an tarlang a, seat 60 awmah seat 44-a candidate tur te hming an tarlang.

Tripura-ah hian BJP hi seat 51-ah an ding dawn a, a thawhpui Indigenous People’s Front of Tripura (IPFT)-te chu seat kuaah an ding thung ang. BJP leh IPFT hian inthlan huna an ṭanrual tur thu Ningani kalta khan an lo sawi tawh a ni.

BJP candidate list hi New Delhi aṭanga puanchhuah niin BJP President Amit Shah kaihhruaina hnuaiah Central Election Committee-te'n New Delhi-a meeting an neihah thutlukna hi an siam a ni.

He meeting-ah hian Prime Minister Narendra Modi, Union Home Minister Rajnath Singh, Finance Minister Arun Jaitley, External Affairs Minister Sushma Swaraj leh CEC member dangte pawh an tel.

Tripura Assembly inthlan hi February 18-ah neih a ni dawn a, vote hi March 3-ah chhiar a ni dawn thung. Tripura Assembly term ding lai hi March 14 khian a tawp ang.