Global Investors Summit-ah Sumdawng liante tel dawn
Assam khawpui, Guwahati-a February 3-4-a Global Investors Summit (GIS) neih turah khawvel huap pawha sumdawnna lama mi challang Ratan Tata, Mukesh Ambani, Dilip Sanghvi leh physician Naresh Trehan-te chu inlan an tum thu Assam Commerce and Industry Minister Chandra Mohan Patowary chuan a sawi.
He hunah hian khawvel hmun hrang hrang aṭangin palai 4, 800 vel an tel dawn thu a sawi bawk.
He summit 'Advantage Assam' tih ni bawk hi cheng vaibelhchhe 32 vel senga buatsaih a ni dawn a, ASEAN ram te bakah Czech Republic, Germany, Japan, UAE leh Israel aṭang tein sumdawng mi an lo fuankhawm dawn a, ram hrang hrang 20 vel aṭangin palai lo kal khawm tura beisei a ni.
Patowary chuan Assam chu a hmun leh a ram leilung awmdan avanga summit neihna tur atana an thlan thu a sawi a, ASEAN expressway pawimawh taka siam chu GIS tum ber pakhat pawh a ni, a ti.
GIS pual hian international leh domestic road show vawi 14 neih a ni tawh a, sorkar mi challang tak tak te pawh an lo tel tawh a ni. Assam Chief Minister in heng roadshow-te hi a buaipui ber a, Patowary chuan palai 4, 800 vel GIS-a tel tur hian an inziak lut tawh niin a sawi.
Minister chuan Air Asia India aṭangin Amar Abrol, Welspun Group mi Balakrishan Goenka, Essel Group Subhash Chandra, Emami mi Sushil Goenka, Edelweiss aṭangin Rashesh Shah leh ITC Sanjiv Puri-te pawhin an hming an ziahluh tawh thu a sawi bawk.