Political party 11-te'n Nagaland inthlan boycott dawn

Nagaland-a political party 11-te chuan Thawhṭanni khan February 27-a state assembly inthlan turah party ticket tichhuak lo tur leh nomination file lo turin thutlukna an siam.

Kum tam tak chinfel theih loha awm Naga buaina chinfel thuai a nih theih nana hetiang thutlukna hi siam an nih thu an tarlang.

Political party 11 hruaitute leh Core Committee of Nagaland Tribal Hoho and Civil Organisations (CCNTCHOC)-ten meeting an neih hnuah thutlukna hi an siam a ni. Heng party zingah hian Nagaland-a rorel lai Naga People's Front (NPF) leh Bharatya Janata Party (BJP)-te pawh an tel.

Political party-te'n thuchhuah inṭawm an siamah chuan state chhunga mipuiten duh thuhmun an neih, 'inthlan hma ngeia buaina chinfel' a nih theih nan leh inthlan ṭhulh hrih a nih theih nan political party zawng zawng, national leh regional party-te pawh telin thutlukna hi an siam thu an tarlang.

Heng party hrang hrang zingah hian Congress, Nationalist Congress Party, Janata Dal-United, Lok Janshakti Party, Aam Aadmi Party, Nagaland Democratic People’s Party, Nagaland Congress, United Naga Democratic Party lehNational People’s Party-te pawh an tel.

Nagaland state assembly inthlan hi February 27-a neih tura rua­hmanna siam a ni a, March 3-ah vote chhiar tur niin March 5-ah chuan engkim tihfel vek hman a nih theih nan Election Commission chuan ruahmanna a siam a ni.

Naga pawl hrang hrang leh Core Committee-te hian Pathianni khan meeting an lo nei tawh bawk a, am meeting zawha thuchhuah an siamah chuan Nagaland inthlana din tum te leh tel tum te chu vau in Nagaland-a remna awm theih nana inbiakna kal mek chu tiṭhuanawp lo turin thuchhuah an lo siam tawh bawk.

Naga hel pawl lian ber Nationalist Socialist Council of Nagaland - Isak Muivah (NSCN-IM) pawhin inthlanna neih a nih chuan remna zawnga inbiakna kal lai mek chu a buai vek dawn thu an lo sawi tawh a ni. NSCN-IM leh sorkar laipui hian August 3, 2015 khan Framwork Agreement an lo ziak tawh a, hemi vang hian buaina hi chinfel thuai a nih mi tam tak chuan an beisei a, inbiakna pawh vawi eng emaw zah an kalpui leh tawh a ni.

Inrinni khan Core Committee hian Chief Election Commissioner O.P Rawat-a hnenah lehkha thawnin, February 27 inthlan chu ṭhulh tir hrih turin an ngen a, buaina chinfel vat a nih theih nana ngen an nih thu an ziak bawk.