Kan party zawm tharte engmah kan tiam lo : Meghalaya BJP

Meghalaya Bharata Janata Party (BJP) hotu Shibun Lyngdoh chuan Thawhṭanni khan tunhnaia an party zawm tharte chu an party tana candidate tura an sawmchhuah loh thu sawiin inthlanah an ding dawn tih an tiam loh thu a sawi.

Lyngdoh chuan Megha­laya MLA an nihna aṭanga bang a BJP zawm ta te chu inthlana BJP ticket-a ding tura an sawmchhuah an nih loh thu a sawi. BJP policy ṭha an tih avang leh saffron party-a rinna an nghah ngam vanga an party zawm an nih thu a sawi a, Prime Minister Narendra Modi-a'n hmasawnna tura a hmathlir te ṭha an tih avanaga an party zawm an nih thu a sawi bawk.

January 2 khan MLA pali-te chuan an MLA nihna aṭanga bang in BJP hi an zawm a, Union Tourism Minister K.J. Alphons leh BJP leader in-charge North East Ram Madhav awm laiin BJP-ah hian an lut a ni.

Heng BJP zawm thar te hi Congress minister ṭhin Alexnader Laloo Hek, Deputy Speaker hlui Sanbor Shullai (nationalist Congress Party), Independent Legislator pahnih - Justine Dkhar leh Robinus Syngkon-te an ni.

Lyngdoh chuan BJP chuan chak ngei tur candidate an zawn dawn thu sawiin assembly constituency 60-a survey an neihna aṭanga ṭha an tih te chauh candidate atan an thlan dawn thu a sawi bawk.