Assam ram chin tihbuai a ni lo ang : Rajnath Singh

31st January, 2018

Union Home Minister Rajnath Singh chuan Pathianni khan Naga peace accord vangin Assam-in a ram chin a hloh dawn loh thu leh, an ramri a khawihbuai dawn loh thu Assam Chief Minister Sarbanda Sonowal a hrilh.

Sarbananda Sonowal hian Rajnath Singh-a hnenah hian Dima Hasao district-a buaina chhuah chungchang leh mi pahnihin nunna an chan tawh thu a hrilh ve bawk a ni.

Sonowal chuan Home minister in Assam-in a ram inches khat pawh a hloh dawn lo nia a sawi thu sawiin, Assam bakah hmarchhak state dang ramri pawh khawih buai a ni dawn lo nia a sawi thu a tarlang.

Dima Hasao district-ah hian RSS leader pakhatin "Greater Nagalim" chhungah he district hi a awm dawn nia a sawi avangin buaina a chhuak nasa hle a, mipuite leh pawl hrang hrang chuan hemi duh lohna hi lantirin rel kawng te an dang a ni.

Mipui pungkhawm hnawhdarh nana police-te silai hmehpuahah Ningani khan mi pahnihin nunna an chan phah a, mi eng emaw zatin hliam an tuar bawk.

Hemi hnu hian darkar 48 chhung district bandh an nei nghal a, Chief Minister pawhin Pathianni khan Dima Hasao district-a pawl hrang hrang inbiakna a lo neihpui tawh a ni.

Sorkar chuan mitthi chhungte hnenah zángnadawmna cheng nuai nga ve ve an pek dawn thu an sawi tawh a, hliam na zual hnenah cheng nuai hnih an pek dawn thu sawi bawkin hliam tuar dangte pawh cheng sing hnih ṭheuh an pe dawn niin an sawi.

Naga hel pawl Nationalist Socialist Council of Nagaland - Isak Muivah (NSCN-IM) leh sorkar laipuiin 2015-a framework agreement an ziahah khan helai district hi Greater Nagalim chhungah a tel dawn nia thu a than avangin buaina hi a chhuak a ni.

NSCN-IM-te hian an duh ber chu Assam, Aruncahal Pradesh leh Manipur-a Naga mite chenna chin chu Naga state a rin luha "Greater Nagalim" siam a ni a, mahse heng state pathumte hian hei hi an duh lo hle thung.

Nagaland buaina hi a rei tawh hle a, 1997-a hel pawl leh sorkar laipuiin inkahhai an puan hnu khan vawi tam tak remna zawnga inbiakna kalpui a ni tawh a, 2015 khan framework agreement hi an siam thei chauh a ni.