Assam cow protection bill : Temple awmna km 5 bialah bawngsa hralh khap dawn

Assam Assembly budget session neih mekah BJP kaihhruai sorkarin bill pharh a tum zinga mi, bawng humhalhna bill-ah chuan Hindu temple leh ‘satras’ (Vaishnav monasteries) awmna aṭanga km 5 bial chhungah bawngsa zawrh khap tura tih a ni.

Chief minister Himanta Biswa Sarma chuan cow protection bill-a an tum ber chu Bangladesh-a bawng tawlhruk ṭhin dan leh tihtawp a ni tih a sawi.

Bill hi Assam Cattle Preservation Act, 1950 thlakna tur a ni a, House-ah hian an pass ngei pawh a rinawm. He bill hian sorkarin phalna a pekna hmun tih lohah chuan bawngsa leh bawngsa aṭanga thil siam dangte hralhchhuah a khap a ni. A bikin Hindu, Sikh, Jain leh bawngsa ei lo sakhaw dang chenna leh; temple, 'satra' leh Hindu sakhaw pawl hmun pawimawh awmna aṭanga km 5 bialah bawngsa hi hralh khap a ni bawk ang.

Bawngsa hi sorkarin a pawm, sa zawrhna bazar-ah hralh phal a ni dawn thung a, mahse heng bazar-te hian sa zawrh leh hralh phalna a neihte chu a leitute hnenah an pe chhuak tel ṭhin tur a ni. Dan an bawhchhia a nih chuan animal market licence chu tihtawp sakin sum chawitir an ni bawk ang. Police leh veterinary officer-te chuan dan bawhchhiate hnen aṭang hian bawng, bawngsa leh a phurhna atana an hman motorte pawh an man sak thei ang. Bawng an mante hi 'gaushala' (cow shelter) ah an hlan ṭhin dawn a ni.

Bill hi pass a nih chuan Assam aṭanga hmarchhak state dang, a bikin Kristian tamna state-a bawng leh bawngsa supply lamah nghawng a nei dawn a, hei vang hian Meghalaya chief minister Conrad K Sangma chuan an state a nghawng dawn chuan sorkar laipuiah hemi chungchang hi thlen a tum thu a lo sawi tawh a ni. State dang sorkarte erawh chuan bill chungchangah hian sawi an la nei lo.

Congress leh All India United Democratic Front (AIUDF) chuan bawng humhalhna tur bill thar siam hian sakhaw inkara buaina a thlen thei dawn nia sawiin, bawnga sumdawng mi tam tak eizawnna thlengin a tuar dawn tih an sawi. All Assam Minority Students’ Union pawhin mipuite ei leh in, food habit chungchangah inrawlh lo turin state sorkar chu an ngen tawh bawk.