UNC-in Manipur CM thusawi awmze nei loah puh

United Naga Council (UNC) chuan Manipur chief minister N Biren Singh-a'n tun hnaia Manipur ram chungchanga a thusawi danah an lungawi loh thu leh, CM thusawi chu awmze nei loa an ngaih thu an sawi.

CM Singh hian Sadar Hills-a Mongjoi khuaa thingṭiak phun runpui neih a hmanpuinaah, "State chhunga khawi ram pawh chu sorkar ta a ni a, sorkar hian hmasawnna leh state mipuite ṭhatna turin a duh anga hmang turin thuneihna a nei a ni," tiin a lo sawi a ni.

UNC chuan CM thusawi chu behchhan awm lo leh awmze nei lo a ni tiin, hetiang zawnga a thu sawi hian ṭhangtharte zingah dik lo takin nghawng a nei thei zawk dawn a ni, an ti. CM chu a thusawiahte fimkhur tawh tura chahin, a hmaa hruaitu lo ni tawhte ang maia awm ve lo turin an ngen nghal bawk.

Thuchhuah an siamah UNC chuan, "Meitei-te ram chu an ram a ni a, chutiang bawkin Naga-te ram chu kan ram a ni a, hnam pahnihte hi kan hriat phak hma aṭangin inṭhenawm ṭha tak an ni. Hnam pahnihte hi British India hnuaiah an awm dun leh a, India independent a din hnuah Manipur state pawh din a ni ve leh a ni," tiin vawiin thlengin movement hran an la nei ṭheuh tih an sawi. "State ni loin mipuite hi an awm hmasa zawk," tiin Manipur-a Naga pawl lian ber chuan an sawi a ni.