AP CM-in state Covid vaccine quota tipung turin ngen

Arunachal Pradesh chief minister Pema Khandu chuan Thawhlehnia prime minister Narendra Modi hoa hmarchhak state chief minister-ten inkawmna an neihah, an state tana Covid-19 vaccine pek chu tipung turin a ngen.

CM Khandu chuan Covid vaccine pek mekah ni khatah mi 15,000 pe chhuak thei an nih laiin, vaccine lam indaih lohna avangin 10,000 chauh an pe thei tih a sawi. An state-a vaccine tiriral pakhatmah a awm lo tih a sawi bawk. Hei vang hian tam zawk an pek chhuah theihna turin an quota tihpun sak turin union health minister thar Manuskh L Madiviya a ngen a ni.

Khandu chuan khawpuiah chauh ni lo, thingtlang lamah pawh vaccine pek chhuah hi ṭha taka kalpui ani a, health worker-te chu thuneitute chuan an thawhpui ṭha hle a ni, a ti. Vaccination team tam tak chu mitinin vaccine an dawn theihna turin, hmun kilkhawr leh hla tak takah kein, tlang chhengchhe tak karah te an kal a ni, a ti.

Rural district-a internet connection ṭha tawk lo chuan Covid hri kai chungchanga data leh report upload pawh a nghawng ṭhin a, hei hian ICRM-in a lo khaikhawmnaah pawh dik lo a awm ṭhin a ni tih CM chuan a sawi. ICMR portal state positivity rate 16.2% nia tarlan pawh, an state data thar berah chuan 8% a ni zawk tih a sawi a ni.