Manipur-a Amit Shah zin tur ṭhulh

Union home minister Amit Shah-a'n March 15-a Manipur tlawh a tum chu ṭhulh a ni. 

Amit Shah hi Manipur-a chief minister B Niren Singh kaihhruai BJP sorkar din champha vawi thumna lawmna hun hmanpui tura kal tum a ni a, vantlang inkhawmah thu sawi tura tih a ni bawk. 

Mahse coronavirus, Covid-19 hri leng laka invenna atan state sorkar chuan March 31 thleng school zawng zawng a khar a ni. Mipui punkhawmna lam chi pawh buatsaih rih lo turin a ti bawk. School khar vek ni mah se,  Board of Secondary Education Manipur (BOSEM) leh  Council of Higher Secondary Schools (COHSEM) exam neih turte erawh a nghawng buai dawn lo tih sorkar thuchhuak chuan a tarlang. Manipur-ah hian Covid-19 vei hi hmuh an la ni lo a, mi 400 chuang chu enthlak mek an ni a, mahse an zingah hian he hri  kai hlauhthawnawm chu an awm lem lo niin an sawi. 

State sorkar chuan he hri leng hi an state-a a luh lohna turin hma a la mek a ni. Myanmar ramri pawh kharin, ramri kaltlanga insumdawn tawnna pawh tihtawp rih a ni. Myanmar aṭanga luh tumte chu border area-ah lo dan zel an ni. Imphal-Mandalay inkara bus tlan tir tur, April thla tir aṭanga tlan tir tum pawh a hun sawn a ni bawk.