Tripura-a Sabroom ICP atan Rs vbc 365 a pe

Sorkar laipui chuan Tripura chhim tawp, Sabroom khuaa Integrated Check Post (ICP) siamna turin cheng vaibelchhe 365 a pe.

Sabroom-a ICP siam thar tur hi Tripura-a Indo-Bangladesh border-a ICP pahnihna tur a ni. Kum 2013 khan Akhaura ICP siam a lo ni tawh a ni.  Chief minister Biplab Kumar Deb chuan union minister Amit Shah a hmuh ṭumin, ICP siamna tur sum pe tura a ngen thu a sawi. A ngenna a lo pawmsak chu lawmawm a tih hle tih a sawi zui bawk. 

State sorkar hian kum 2016 khan Sabroom ICP siamna tura a rawtna chu ministry of home affairs-ah a lo thehlut tawh a ni. A thuphungin an rawtna hi pawmsak ni mah se, hma lakna awm loin hun rei tak tihkhawtlai a lo ni tawh a ni. 

CM Deb chuan Sabroom-ah hian special economic zone (SEZ) siam a ni dawn bawk tih sawiin, Bangladesh sumdawngte chu investment ti tura hip luh an tum tih a sawi. 

Deb chuan BJP kaihhruai sorkar a din hnuah an state chuan hma a sawn chak hle tih a sawi a, category hrang hrangah an hmasawnna avangin lawmman pawh an lo dawng tawh tih a sawi. Kum hnih chhung lekin rural development department chuan hnathawh ṭhat lawmman 13 zet a dawng hman tawh a ni, a ti.

Tripura hian March 27-ah 'fastest-growing' state award  chu New Delhi-ah a dawng dawng a,  hemi rual hian Agartala chuan fastest-growing city award a dawng tel nghal dawn a ni. Award an dawn tur chungchang hi prime minister Narendra Modi chuan ziakin a hriattir tih Deb chuan a sawi bawk.