Fee pek theih loh vangin naupangte class kal khap tur a ni lo : Nagaland CS

Nagaland chief secretary J Alam chuan Nilaini khan hriattirna tichhuakin, zirlai naupangte chu fee an pek theih loh avangin eng school mahin class, online leh offline an kal tur leh, examination-an hmachhawn tur an khap tur a ni lo, a ti.

Fee pek tlak theih rih loh avangin school-te chuan zirlai examination result chu a hren sak tur a ni lo tih sawiin, Chief Secretary chuan state chhhunga private school dintu mimal, society leh pawlte bakah unaided private institution-te a hriattir a ni.

Hri leng vanga school khar a nih chhunga activity tih theih lohah fee lak tur a ni lo tih CS chuan a ti bawk. School enkawltute hnenah zirlai harsa bikte dinhmun ngaihtuah a, an fee tihtlem sak dan turte pawh ngaihtuah turin a ti bawk. Hemi rual hian school tinte chu zirlaite thliarhranna awm lo a online education an kal theihna tur hmanruate ngaihtuah sak tura ngen an ni bawk.

Northern Angami Students Union (NASU)-in June thlaa state sorkar hnena zirlaite chungchanga ngenna an thlen hnuah he hriattirna hi sorkar chuan a tichhuak a ni. Zirlai pawl hian state chhunga private institution-te hnenah physical class kal theih a nih hma chu zirlaite fee tihhniam sak turin an ngen a ni. Hei bakah hian fee pe thei lote class kal khap leh exam neih khapsak lo turin an ngen bawka ni.