Assam nena ramri buaina chungchang AP eptu party-ten President hnenah thlen

Arunachal Pradesh-a eptu party pali-te chuan president Ram Nath Kovind hnenah ngenna thlenin, Assam state nena ramri buaina an neih mek chungchangah inrawlh turin an ngen.

Rashtrapati Bhavan-a memorandum an thehluhah, eptu party-te chuan ramri chungchanga state ṭhenawm nena buaina an neihte chinfelna tur policy chu sorkar laipui chuan a siam a ngai an ni tih an sawi bawk.

President hnena ngenna thlenah hian People's Party of Arunachal (PPA) president Kahfa Bengia, Arunachal Pradesh Congress Committee (APCC) vice president Techi Tage Tara, Janata Dal (Secular) senior leader Jarjum Ete leh Janata Dal (United) state unite chief Ruhi Tagung-ten an hming an ziak an ni.

Eptu party-te chuan Arunachal Pradesh-a Papumpare district huam chhung, Kimin-a Assam sorkarin police leh official dangte a dahna chhan sawifiah turin an phut thu an lehkha thehluhah hian an tarlang bawk.

Hetih lai hian AP chief minister Pema Khandu chuan DoNER minister GK Reddy hoa Ningania virtual meeting neihah, ramri buaina an neih chu Assam nen a thuphungin court-a thlen kher loa chinfel an remti tawh tih a sawi. Khandu chuan Assam chief minister Himanta Biswa Sarma pawh a sawipui tawh tih sawiin, hun rei tak inter-state boundary chungchanga buaina an neih chu chinfel dan tur ngaihtuahin hma an la ṭan mek a, an ruahman anga thil a kal theih chuan thla rei lotea ramri buaina chu an chinfel theih a beisei thu a sawi.

Arunachal Pradesh bakah hmarchhak Nagaland, Meghalaya leh Mizoram-te chuan Assam state nen ramri buaina an nei mek a, buaina pawh a chhuak fo a ni. State ramri ṭhenkhatah chuan buaina punlun zel tur vening central paramilitary force-te pawh dah an ni.

North East Students' Organisation (NESO) chuan union home minister Amit Shah hnenah ngenna thlenin, hmarchhak state hrang hrangten ramri chungchanga buaina an neih mekah sorkar laipui chu inrawlh a, a chinfel dan tur ngaihtuah turin an ngen.

Home minister hnena memorandum an thehluhah, NESO secretary general Sinam Prakash Singh chuan state ramri inchuhna hi hun rei tak aṭanga awm tawh a ni a, buaina pawh a chhuak fo tih sawiin, hei vang hian ramri hrula cheng mi tam takin harsatna tawkin, nunna chan pawh an awm fo a ni, an ti. NESO chuan ramri hrula chengte pawh kawmin state sorkarte chu an buainate chinfel dan ngaihtuah thuai turin an nawr fo a, mahse tun thlengin inremna mumal tumahin an la siam thei lo a ni, an ti.