Manipur-ah ni 10 chhung total curfew puang dawn

Manipur sorkar chuan an state-ah coronavirus Delta variant a darh thei nia a lan avangin hri darh mek chhut chat a nih theihna atan July 18 aṭangin ni 10 chhung state pumah total curfew a puang leh dawn.

Principal secretary (health) Vunlunmang chuan Pathianni zing aṭanga total curfew neih a nih tur thu hi Ningani khan hriattirna a tichhuak a, hemi chhung hian Covid testing, medical services, water supply,power supply, telecom/internet services, air travel leh agricultural activity-te erawh phal a ni ang. Covid-19 hri leng dona kawngah mipuite chu sorkar hmalakna ṭha taka thlawp turin a ngen bawk.

State sorkar hian July 9 khan hri leng vanga zan lam curfew, zan dar 7 aṭanga a tuk zing dar 5 a puan chu July 20 thleng atan a lo pawtsei tawh a ni.

Chief minister N Biren Singh chuan hri darh mek chhut chatna turin khauh taka hma lak a ngai tih a sawi. Curfew puan chhung hian vaccine pek chhuah erawh kalpui chhunzawm zel a ni dawn a, vaccine la turte chu an chhuah phalsak an ni dawn tih a sawi.

Ningani khan Manipur-ah hian hri kai thar mi 1,104 awmin hun rei tak hnuah ni khata hri kai an tam ber ṭum a ni. Hri kai hmuh chhuah hi 81,560 an awm tawh a, active case 8,558 an awm mek. Ningani vek khan hri vangin mi 14 an thih belh leh bawk a, heng mite nen hian Covid-19 thihpui hi mi 1,340 an awm tawh.