Gauhati HC-in Anganwadi hawng turin Nagaland sorkar hriattir

Gauhati High Court-a Kohima Bench chuan Nagaland sorkar hnenah state chhunga Anganwadi centre-te chu hawng vek turin a hriattir.

Anganwadi centre khar a nih chungchanga petition thehluh an ngaihtuah hnuin, Justice Songkhupchung Serto leh justice S Hukato Swu awmna bench chuan state sorkar hriattirna hi a tichhuak a ni.

Petition thehluttu aiawha ding, advocate Neiteo Koza chuan Anganwadi centre-te khar a nih avangin nu, nau pawm lai leh naupangte chuan chaw ṭha an dawn ṭhin chu an dawn chhunzawm thei lo tih a sawi. Hripui leng mekah immune system tihchak a ngaih laiin, chaw ṭha an dawn theihna tur centre-te khar a ni chu a ṭha lo hle tih sawiin, heng centre-te hi hawn tir leh thuai turin a ngen.

Court chuan hri leng chu a bikin mirethei zawkten an tuar nasa a, kawng hrang hranga puihna an mamawh hle tih sawiin, hamṭhatna an dawn theihna an kawtkai ngeia an hmuh theihna tura hma lak a ṭul tih a sawi. State sorkar leh social welfare, food & civil supplies department-te chu Anganwadi centre-te hawng a, centre aṭanga chaw ṭha an semte chu a dawng theite hnenah pe chhunzawm leh nghal turin a ti.