Assam sorkarin zirlai nuai 8-te smartphone a pe dawn : Covid-19 vanga thi chhungte Rs nuai 1-in ral an ni

Assam sorkar chuan hripui leng vanga zirna pangngaia kalpui mumal theih loh a, online class-te kal a ngaih avangin sorkar school-a Class 9 leh 10 zirlaite hnenah smartphone a sem dawn. Zirlai nuai 8 vel hnenah smartphone hi semin, free internet package dahsak vek an ni bawk ang.

Chief minister Himanta Biswa Sarma kaihhruai sorkar hnuaia budget hmasa ber, state budget 2021-22 pharhtu, finance minister Ajanta Neog chuan pharhin, budget-ah hian zirlaite hnena smartphone semna tur hi telh a nih thu a sawi.

Minister chuan hripui leng leh lockdown puante a nih fo avangin zirna pawh digital class-in kalpui a ni a, hetihlai hian zirlai tam tak chuan smartphone an neih loh avangin harsatna an tawk a ni tiin, heng zirlaite harsatna sutkianna tur hian smartphone hi an sem dawn tih a sawi a ni.

Nego hi Assam-a hmeichhiate zinga finance minister ni thei hmasa ber a ni a, Tarun Gogoi kaihhruai Congress sorkarah khan senior minister a lo ni tawh bawk. Kumin March-April assembly inthlan hma khan BJP a zawm a ni.

Hri vanga thi chhungte Rs nuai 1-in ral dawn
Budget-ah hian Covid-19 hri vanga thi chhungte, cheng nuai khat zela ral an nih tur thu tarlan a ni bawk. Assam-ah hian Inrinni liam ta thleng khan hripui vang hian mi 4,984 an thi tawh a, an zingah hian kum 18 hnuai lam mi 56 an tel.

State sorkar hian a hmain hripui vanga an pasalte chan, hmeithaite tanpuina tur ‘Chief Minister COVID-19 Widow Support Scheme’ a lo siam tawh bawk. He scheme hnuaiah hian hri vanga pasal chante hi Rs nuai 2.5 pek an ni. Hei bakah hian hripui vanga nu leh pa chan, fahrahte chhawmdawlna tur, thla tina Rs 3,500 pekna tur scheme pawh a siam tawh bawk.

Finance minister chuan an state-a hri a len tirh aṭanga kumin June thla thleng khan hri kai, mi 95,770-te a thlawna enkawl niin, enkawl an nih chhung hian an chaw ei tur, nitin Rs 300 man hu a thlawnin pek vek an ni bawk, a ti.

Rs Vaibelchhia 566 deficit budget-ah hian Assam sorkar chuan chhiah lak tharna tur engmah a siam lo a, sorkar hna nuai khat siam a tiam thung. Hei bakah hian Food Security act hnuaiah thingtlang biala mi retheite hnenah chaw chhun a thlawna semna tur siam a ni bawk a ni.

Microfinance loan, cheng vaibelchhe 12,000 ngaihdamna tur siam niin, hei hi mi nuai 26 chuangin an chhawr dawn a ni. Loan ngaihdamna chhawrtu tur zinga a tam zawk hi hmeichhia niin, hripui leng vanga hna an thawh chhunzawm theih loh avangin microfinance organisation aṭanga an loan lakte an rul thei lo a ni. Loan ngaihdam hi BJP chuan inthlan dawna a thu tiam zingah a lo telh sa tawh a ni.