Nagaland : Covid vaccine la loten hlawh an la thei dawn lo
Nagaland sorkarin hriattirna a tihchhuah tharah, Civil Secretariat leh Directorate office-a thawkte chu Covid vaccine an lak loh emaw, ni 15 dana Covid negative certificate emaw an neih zel loh chuan an hna thawh zawm phal a ni dawn lo a, an hlawh pawh tihtawp sak an ni dawn tih a sawi.
He thutlukna hi mipuite hriselna leh himna atana High Powered Committee (HPC) on Covid-19 in a siam a nih thu chief secretary J Alam chuan thupek tihchhuah hian a tarlang nghal bawk.
"Nagaland Civil Secretariat leh Directorate-a thawk zawng zawngte chu office an kal chhunzawm theihna atan vaccine la vek tura ngen an ni. Vacine an la lo a nih pawhin ni 15 danah RT-PCR, TruNAT leh CBNAAT hmangin Covid-19 negative test report an thehluh ziah a ngai thung ang," tiin, July 31 thleng vaccine dose khatna tal la lo emaw, Covid negative test report emaw nei lo chu an hlawh hrensak an ni ang a, office pawh an kal thei dawn lo a ni. Office an kal loh chhung hi leave without pay anga chhiar sak an ni zui bawk ang.
Hetih lai hian nimin aṭang khan Nagaland-ah khuahkhirhnate thlahdul chhoin, Unlock-3 phase kalpui ṭan a ni. July 26 aṭangin college-te chu hawn ṭan a ni tawh dawn a; teaching leh non-teaching staff, Covid vaccine dose hnih la tawh leh dose khatna lak aṭanga ni 15 liam tawh chin chuan an hna an zawm vek tawh ang.
College hawn dan kalphung ang bawk hian August 2 aṭangin Class 11 leh 12-te pawh kal tir tum an ni bawk.
Restaurant-te pawh 50% capacity-a hawn phalsak an ni a, mahse thawktute chu vaccine dose la kim tawh emaw, dose khatna an lak aṭanga kar hnih tal liam tawh emaw an ni tur a ni.
State sorkar chuan state dang aṭanga zin leh hawte chu vaccine dose la kim tawh an nih chuan entry point-ah Covid-19 test an ngai tawh lo a, inkhunghran pawh a ngai tawh lo tih a sawi. Vaccine dose khatna chauh la erawh chu ni sarih chhung inkhunghrang leh tura tih an ni thung.