Tripura CM-in PM Modi a hmu

Tripura chief minister Biplab Kumar Deb chuan kar liam ta kartawp khan prime minister Narendra Modi chu New Delhi-ah a hmu a, state mamawh hrang hrangte a sawipui. CM hian BJP national general secretary BL Santhosh pawh a hmu bawk.

CM Deb hian a cabinet a tilian dawn nia sawi a ni a, hei hi New Delhi-a an party hotute nen hian an sawiho nia tarlan a ni.

Assembly inthlan tur thlirin CM hian a cabinet hi siksawiin hnam hrang hrang aiawhte pawh ministerial post chantir a tum niin BJP state hruaitu pakhat chuan a sawi. Kum 2024 Lok Sabha inthlanpui neih dawn khan union cabinet chu siksawiin, hmel thar leh ṭangṭhar zawk eng emaw zat dah an ni a, hetiang bawk hian Deb pawh hian hma lak a tum niin an tarlang.

Tripura council of minister-ah hian minister pali dah belh theih a la ni a, Deb kaihhruai sorkar khan seat pathum hi hnawhkhat loin a dah awl a, kum 2019-a health minister Sudip Roy Barman a ban khan seat khat dang a awl belh leh a ni.