Boycott tumna awm mah se Inthlang turin kan inbuatsaih: CEO

Nagaland Chief Electoral Officer Abjijit Sinha chuan Thawh­lehni khan Naga Civil Society leh political party ṭhen­khatin inthlan boycott tum mah se inthlanna nei tura an inbuatsaih thu a sawi.

Core Committee of Naga­land Tribal Hoho and Civil Organisations (CCNTCHOC)-te'n Chief Election Commissioner O.P Rawat-a hnena inthlan ṭhulh hrih tura an ngen chungchanga thuchhuah a siamah, Abijit Sinha chuan inthlanna nei tura inbuatsaihna an kalpui thu a sawi. Inthlanna neih tur atana Election notification pawh Nilaini khan tichhuah hman ngei an tum thu a sawi bawk. Notification tihchhuah a nih hnuah chuan returning officer-te hnenah zing dar 11 aṭanga tlai dar 3 chhungin February 7 thleng nomination a file theih tawh dawn niin a sawi.

Sinha chuan inthlan hun puanchhuah chu constitution hnuaia awm a nih avangin ruahman anga kaltlangpui a nih dawn thu a sawi a, inthlan chu kaltlangpui an tum thu sawiin inthlan tibuai lo turin mipuite a ngen bawk a ni.

CEO chuan venhimna lam buaipuitu tur Armed force-te pawhin state chhung an luh ṭan tawh thu sawiin company 289 vel inthlanna neih lai hian an duty dawn tih a sawi.

Thawhṭanni khan CCNTCHOC leh Nagaland political party 11-te chuan inthlan boycott an tum thu joint resolution an siam a, mahse BJP chuan Thawhlehni khan central lama an hotute thu lo chuan thutlukna an siam dawn loh thu sawiin he joint resolution aṭang hian an inhnukdawk leh a ni. He joint resolution-a an party aiawha hming ziaktu state vice president Kheto Sema pawh an suspend thu an sawi.

Core Committee chuan BJP chu an dinhmun tichiang turin a hrilh nghal a, joint declaration siam chungchanga an dinhmun dik tak sawi chiang turin a hrilh. Core Committee chuan kum 70 zet chinfel theih loha awm tawh Naga buaina chu chinfel an duh takzet em tiin a zawt bawk. State chhunga boruak duhawm lo a thleng a nih pawhin BJP chu mawhphurtu an ni dawn niin an sawi bawk.

Election Commission lamin thu leh hla thar an neih loh avang leh inthlan a hun ngaia neih a nih dawn thu sorkar hotu lian lamin an sawi avangin CCNTHCO chuan nimin khan hmun hrang hrangah bandh an huaihawt a, Dimapur, Mokokchung, Peren, Tseminyu leh Zunheboto-ah te bandh hi an nei a ni.

Hetih hian pawl ṭhenkhat Anga­mi Public Organization (APO), Chakhesang Public Orga­nization (CPO), Eastern Naga People’s Organization (ENPO) leh Lotha Hoho-te chuan bandh hi an thlawp loh thu an lo sawi ve bawk.