CM rethei ber Tripura CM-in Rs 1,520 chiah kawl

Tripura Chief Minister Manik Sarkar chu India ram Chief Minister zinga rethei ber a nih thu ZeeNews chuan a tarlang.

Term nga lai rorel tawh Manik Sarkar hian pawisa faiin Rs 3,930 chiah a nei tih nomination paper a file naa election affidavit-ah a lang.

Left Front hruaitu hian a hlawh zawng zawng Communist Party of India - marxist (CPI-M)-ah a donate ṭhin a, an party aṭang hian subsistence allowance-ah Rs 5,000 a dawng ve thung. Sarkar hian income tax return a file ngai lo a ni.

Kum 69-a upa Tripura Chief Minister hian a pawisa neih zinga Rs 1, 520 hi a kutah kawlin Rs 2,410 hi a bank account-ah a dah thung a, ama pualin in leh lo pawh a nei lo bawk.

Kum 20 kalta chhung khan CM official quarter-ah a cheng a, thlai chinna hmun tur lo pawh a nei lo a ni.

Report-in a tarlan danin mobile phone pawh a keng ngai lem lo a, email emaw social media account pawh a nei lo.

Sarkar-a nupui, Pan­chali Bhattacharya, sorkar hnathawk pension tawh ve thung chuan Rs 20,140 a kutah a kawl a, bank account pahnihah Rs 1,24,101 leh Rs 86,473.78-a dah thung. Fixed deposit in cheng nuai 2, nuai 5 leh nuai 2.25 a dah bawk a, heng bakah hian jewellery gram 20-a nei bawk a ni.

Panchali Bhattacharya hian ram sq.ft 888.35-a zau a nei a, cheng nuai 21 man hu niin in sak nan cheng nuai 15 a invest bawk. Kum 2011-12 khan income tax return a file a, hetah hian cheng 4,49,770 a lalut niin a inziak. Hemi hnu hian income tax return hi a la file leh lo. An nupa hian fa an nei lo bawk a ni.

Manik Sarkar hi Dhan­pur Constituency-ah a ding dawn a, Thawhṭanni khan nomination a file a ni.