Congress-in Meghalaya-ah hnehna a chang ang : Rahul

Congress national president Rahul Gandhi chuan Nilaini khan Meghalaya-a rorellai Congress bawkin hnehna a chan dawn thu a sawi. Inthlan hnaihna state dang Rajasthan, Madhya Pradesh leh Chhatisgarh-ah te pawh Congress in hnehna an chan ngei a rin thu a sawi.

"Meghalaya-ah hian ṭha takin kan tih ka ring a inthlanah pawh hnehna kan chan ngei ka ring a ni" tiin Shillong-a campaign a neihnaah journalist-te hmaah a sawi.

Rahul Gandhi chuan seat chungchang leh thildang chu ka sawitam lem lo anga, mahse ramchhung hmun hrang hrangah BJP-te'n mipui duhdan an ngaithla duh lo nia hriatna a nasa hle a ni, a ti bawk. BJP chu mipuite duhdan ngaipawimawh lo leh an party duhdan chauha hmalaah a puh bawk.

Gandhi chuan Demonetisation leh GST pawh a sawisel bawk a ni. BJP kaihhruai sorkar laipui chu a thutiam anga an awm ngai loh thu leh Meghalaya-ah pawh chutiang tho chuan an ti dawn niin a sawi.

Rahul Gandhi hian sakhaw hrang hrang leh tualchhung sakhaw la vuantute chu Nilaini khan meeting a neihpui bawk a ni.

BJP leh RSS-te chuan idea pakhat chiah an kalpui thu sawiin hetih lai hian India ramah mi hrang hrang, rinna hrang leh ngaihdan hrang nei kan khawsa ho si a ni, a ti.

Hetih lai hian BJP lam chuan Rahul-a'n Shillong-a a jacket hak chungchang chu an sawi duh hle a, Burberry jacket cheng 63,000 man a ha nia sawiin, Ram Mandhav pawhin hmarchhak state-te chu rethei taka an siam hnuah an hruaitute chuan jacket 70k man an ha leh si niin Congress chungchang a sawi a ni.

Congress hruaitu Renuka Chaudahry chuan BJP chu chhangletin, hetiang jacket hi an duh a nih chuan cheng 700 in a ang chiah siamtir a nih theih thu leh a duh a nih chuan Prime Minister tan pawh an siamsak thei niin a sawi.