Tripura: BJP Candidate 51-te'n nomination file

Tripura assembly inthlan neih tura eptu party Bharata Janata party (BJP) candidate 51-te chuan Nilaini khan nomination an file fel ta a, Nilaini kha candidate tana nomination file ni hnuhnung ber a ni.

BJP thurualpui Indigenous Peoples Front of Tripura (IPFT)-te erawh chuan Thawhlehni kha nomination an file tawh thung tih IPFT supremo NC Debbarma chuan a sawi a, BJP nen an inremsiamna angin mi pakua in nomination an file a ni.

Tripura Additional Chief Electoral Officer Tapas Roy chuan nomination paper tam tak file a nih tawh thu sawiin a zat erawh chhiar ṭhat a la ngai niin a sawi.

BJP state President Biplap Kumar Deb chuan Left Front sorkar chu thlak an nih tawh dawn thu sawiin, tumahin an dan theih dawn loh thu a sawi. Deb hi Banamalipur assembly constituency-ah a ding dawn a ni.

CLP hruaitu Gopal Chandra Roy pawhin Banalamipur-a ding tur hian nomination a file a, Congress chu Left eptu lian ber an nih thu sawiin, mipui lam pawhin inthlan hunah Congress an thlawp ngei dawn a ni, a ti. BJP chu mipui ten an duh dawn loh thu a sawi bawk.

Roy chuan Congress pawhin constituency awm zawng zawngah nomination an file tawh thu a sawi.

Left Front lam pawhin Thawhlehni khan nomination an file fel tawh a, hetih lai hian Khowai constituency-a ding tur Biswajit Dutta erawh damdawiina a awm avangin a la file ve lo niin party thuchhuah chuan a tarlang.