Assam CM-i'n ruihhlo Rs vbc 163 hu hal ral

Assam chief minister Himanta Biswa Sarma chuan state police-ten an man, ruihhlo cheng vaibelchhe 163 man hu chu a hal ral.

Inrinni leh Pathianni khan CM hian hmun pali, Diphur, Golaghat, Barhampur leh Hajoi-ah ruihhlote hi tihchhiat an ni.

Himanta Biswa Sarma kaihhruai BJP sorkar hian May thlaa thuneihna an chan aṭang khan state chhungah ruihhlo do beihpui a thlak nghal a ni. State chhunga ruihhlo tlawhrukte tihtawp tumin an bei dawn a, hemi rual hian ruihhloin a tihbuaite chhanchhuah leh chhawmdawl an tum tih CM chuan a sawi.

Sarma chuan May 10 leh July 15 inkar khan state police-te chuan Narcotic Drugs and Psychotropic Substances (NDPS) Act hnuaiah thubuai 874 ziak lutin, state chhunga ruihhlo zuar mi 1,493 an man a, ruihhlo cheng vaibelchhe 163 hu vel an man tih a sawi bawk. Hemi chhunga ruihhlo an mante hi heroin kg 27, marijuana kg 12,823, opium kg 41, khuh damdawi bur 78,000, pychotrpic table maktaduai 1.3, morphine kg 3, cyrstal methamphetamine kg 3, poppy straw kg 3,300 leh pawisa fai Rs vaibelchhe 1.80-te an ni.

Inrinni liam ta khan CM hian Golaghat leh Diphu-ah ruihhlo eng emaw zat hi a hal ral a, Pathianni khan Barhampur leh Hojai-ah a hal ral leh bawk.

Assam chu hmarchhak aṭanga mainlaind India-a ruihhlo tawlhluhna kawngpui a ni tih CM chuan sawiin, "Kan ruihhlo mante hi Assam-a tawlhluh zinga 10% vel chauh niin kan ring a, heta aṭanga chhut hian kumtina Assam kaltlanga ruihhlo tawlhluh hi cheng vaibelchhe 5,000 hu vel dawn a tlin kan ring a ni," a ti. Ruihhlo do beihpui thlak chu ngawrh taka neih chhunzawm zel a ni dawn tih sawiin, police official-te pawh ruihhlo zuar leh tawlhrute laka beihpui thlakna turin zalenna pek an ni tih a sawi.