SC-in Manipur activist chhuah turin thu pe
Supreme Court chuan bawng ekin Covid hri a tidam thei lo tih Facebook-a sawi avanga man, Manipur activist Erendro Leichomban chu chhuah nghal turin nimin khan thupek a ti chhuak.
Kum 40 mi, Leichombam leh local journalist Kishorenchandra Wangkhem (41)-te chuan May 13-a Covid-19 vanga thi, state BJP president S Tikendra Singh chungchang an sawinaah, bawng ek leh bawng zun te chuan Covid-19 an tidam thei lo tih an sawi a ni. An thusawi avang hian state BJP vice president Usham Deban leh general secretary P Premananda Meetei-te chuan an lakah FIR thehlutin, hemi ni vek hian police-te chuan an chenna in aṭangin man an ni a, National Security Act (NAS) hnuaiah thubuai siamsak an ni zui bawk.
Erendro pa, L Rahugmani Singh chuan a fapa laka NSA hnuaia thubuai siamsak a nih chungchangah Supreme Court-ah petition a thehlut a, nimin khan court chuan ngaihtuahin Erendro Leichomban chu ni khat pawh jail-ah hren chhunzawm tur a ni lo tiin, tlai dar 5 hma ngeia chhuah turin a ti a ni.