Sikkim : Hri leng thawh hnihnaah hri kai 155% in an pung

Sikkim-ah Covid-19 hri leng thawh hnihna, kumin March 1 aṭanga thlengah a thawh khatna aiin hri kai zat 155% in an pung tih state health department data thar ber chuan a tarlang.

Hri leng thawh hnihnaah hian thihpui pawh 49% in an tam zawk bawk. Hripui thihpui tawh zinga 181 chu virus vang liau liau, a hmaa natna dang engmah la nei lo an ni tih an tarlang bawk. Hetih lai hian thi zinga 86 chu natna dang nei sa an ni thung.

Mi nuai 7 vel chenna, Sikkim-ah hian hripui vangin mi 319 an thi tawh a, heng zinga 136 chu hri leng thawh khatna laia thi an ni. Hri leng thawh khatna thi zinga 82% chu natna benvawn nei an nih laiin, a thawh hnihnaa thi zinga 33% chauh chu natna benvawn nei an ni.