House-to-house test vangin positivity rate a sang : Manipur health director

Manipur health director, Dr K.Rajo chuan Manipur-a Covid-19 positivity rate a sanna chhan pakhat chu house-to-house test an kalpui vang niin a sawi. Hri darh zel tur venna atan sorkarin ruahmanna ṭha tak a siam avangin mipuite tan chiai phahna tur a awm lo, a ti.

State sorkar chuan an state-ah Delta variant kai an pun chhoh avangin July 10 aṭang khan house-to-house test hi a kalpui ṭan a, hri kai zingah Delta variant kai hi mi 205 hmuh an ni tawh.

Dr K Rajo chuan test an kalpui dan chu hri darh tur venna atan a ṭangkai hle tih sawiin, "In tina test kalpuinaah hian positive pawh tam tak hmuhchhuah an ni. Hri kai tih hriatchhuah hma hian rang takin an inkhunghrang nghal thei a, hei hian hri darh tur pawh a veng hle a, hri kaite pawh rang taka enkawl nghal an ni bawk. He ruahmanna kalpui a nih hnu hian nitin hri kai 400-600 vel an enkawl dam zel an ni," a ti. Hemi rual hian mipuite chu hri leng laka invenna tura kaihhruaina siamte ṭha taka zawm chhunzawm zel turin a ngen zui bawk.

State health department-in a tarlan danin house-to-house testing kalpui a nih aṭangin July 16 thleng khan mi 11,469 test zingah positive 1,211 hmuh chhuah an ni. Delta variant a darh avangin state sorkar chuan July 18 aṭang khan state pumah ni 10 chhung atan total curfew a puang zui bawk a ni.