Meghalaya cabinet-in ‘Meghalaya Youth Policy 2021’ pawm

Meghalaya cabinet chuan state chhunga ṭhalaiten state leh ram tana mi ṭangkai an nih theihna tura an thiam leh theihnate an hman ṭangkai theihna tur, Meghalaya Youth Policy 2021 siam chu a pawm.

Meghalaya hian ṭhalaite pual bik hian policy a nei lo a, hei vang hian sorkar chuan policy hi siam ṭulin a hria a ni.

Chief minister Conrad K Sangma chuan, "State mipui zinga 31% hi kum 15-29 inkar an ni. Heng ṭhalaite puala policy siam hi sorkar chuan ṭul a ti a, policy hi duangin cabinet chuan a pawmsak a ni. Policy kimchang hi sorkar chuan a tichhuak thuai ang," a ti.

‘Meghalaya Youth Policy 2021’ hi Sports and Youth Affairs department-in a duan a ni a, state sorkarin kum 10 chhunga India rama GSDP per capita leh SDG ranking-a top 10 state zinga Meghalaya a awm theihna tura hmathlir a neihte zulzuiin an siam a ni.

He policy-ah hian Education, Health & Wellbeing, Counselling & Mentoring, Employment Skill Development & Entrepreneurship, Sports, Cultural & creative industries, Engagement & Leadership, Inclusion leh Environmental Consciousness lam ngaih pawimawh a ni, department 10 hnuaiah ṭhalaite pual hian progamme 45 siam tum a ni bawk.

Meghalaya-a cheng mi maktaduai 38.29 zinga 74% chuang, mi nuai 28.48 chu kum 35 hnuai lam an ni. Tuna an policy duanah hian kum 15-29 inkarte puala tih deuh ber a ni a, hei bakah hian kum 5-14 inkar pualin programme pawh duan anla tum bawk a ni.