Assam-in hmarchhak state dang aṭanga lutte Covid-19 test neih vek a phut

Assam sorkar chuan hmarchhak state dang aṭanga airport leh rel station kaltlanga a state-a lutte chu Covid-19 test neih vek a phut.

Thlawhtheihna leh rel hmanga Assam-a lut, hmarchhak mite chu a hmain Covid-19 test an neih ve kher phut an ni lo. Mahse hmarchhak state hrang hrangah hri leng hluar a, hri kai an pun zel avangin he ruahmanna thar hi sorkar chuan a siam a ti.

Assam sorkar chuan state chhunga hri kai la pun zualna, positivity rate sanna district panga - Jorhat, Golaghat, Sonitpur, Biswanath leh Lakhimpur district-ah total lockdown a puan chhunzawm bawk. July 7 khan district pasarih chu hri kai an tam avangin containment zone-ah puangin, total lockdown puan a lo ni tawh a ni.

District pangaah hian total lockdown hi puan chhunzawm a ni dawn tih state health minister Keshab Mahanta chuan sawiin, district dang nen inkalpawh khap a ni. A hmaa total lockdown puan telna, Goalpara leh Morigaon district-ah chuan hri lengin ziaawm lam a pan avangin khuahkhirhna thlahdul a ni thung.