AP Congress-in petrol leh diesel chhiah tihniam turin phut

Arunachal Pradesh Congress Committee (APCC) chuan chief minister Pema Khandu kaihhruai BJP sorkar chu petrol leh diesel-a state sorkarin freight charge, excise duty leh value added tax (VAT) a lakte tihniam turin an phut.

Congress party hian chief minister office-ah an thil phut chungchang hi thehlutin, petrol leh diesel bakah, nitin mamawh man sang zel chu mipui nawlpuite tan harsatna leh phurrit nasa tak a thlen tawh a ni, an ti.

"Sorkar laipuiin policy hlauhawm tak a hman avangin thla hnih liam ta chhung ringawt khan ram chhunga fuel man hi ṭum 29 zet tihsan a ni tawh a ni," tiin ram chhunga khawpui 150 chuangah petrol litre khat man chu Rs 100 a kai tawh tih an sawi. Hetiang bawk hian chhungkaw khawsakna atana mamawhte pawh a man a sang chak hle a, hripui leng mek nen mipuite harsatna nasa takin a belhchhah tih an sawi.

State sorkar chu mipuite harsatna an tawh mek karah hlawkna lo neih tum lo tura ngenin, freight charge, excise duty leh VAT a lakte chu tihniam thuai turin an phut a ni. Hei bakah hian Papum Pare district-a Kimin hmuna LPG bottling plant chu kalpui chhunzawm tawh tur leh, state khawchhak lam bialah LPG bottling plant thar siam turin an ngen.