Nagaland-ah zirlai 2,090-in hri kai tawh

Nagaland-ah kumina Covid-19 hri kai hmuh chhuah tawh zinga zirlai 2,090 an tel tih state health department official data-ah tarlan a ni. Hei hi kum 2021-a hri kai hmuh chhuah tawh aṭanga 14.36% an tling.

Kum 2020-ah khan zirlai zingah Covid hri kai 914 hmuh chhuah niin, hei hi hemi kuma hri kai zinga 7.66% an ni.

'Students' category'-a hri kai zingah hian kum 2020-a hri kai tam ber chu kum 18-24 inkar niin mi 339 an awm a, kum 2021-ah chuan kum 11-17 inkar an tam ber thung a, 2,090 zingah 860 an awm.

Kum 2020-a zirlai hri kai zingah kum 11-24 inkar 71% an awm a, kum 2021-ah 78% an awm thung. Kum 2020 khan kum 4-10 inkar hri kai 223 an awm laiin, kuminah chuan 416 an awm tawh a ni.

Covid-19 hri thihpui zingah kum 2020 khan kum 0-29 inkar pathum an awm a,kuminah chuan July 9 thleng khan mi 12 an awm tawh thung. July 10 hnu lamah chuan kum 29 hnuai lam hri vanga thi an awm lo.