Meghalaya-Assam border chungchang ngaihtuahin State pahnih CM-te July 23-ah inhmu dawn

Megalaya chief minsiter Conrad K Sangma chuan Assam nena state ramria buaina an neih chungchang sawidun turin July 23 hian Assam chief minister Himanta Biswa Sarma nen official-in an inhmu dawn tih a sawi.

State pahnih chief minister-te hi tunhnaiah official loin an lo inhmu tawh bawk a, ramri buaina thleng chungchangte pawh an lo sawidun tawh a ni.

CM Sangma chuan union home minister Amit Shah-a'n Shillong a tlawh hma, July 23-ah Assam CM hi Shillong-ah zinin, official meeting an nei dawn tih a sawi. "He meeting-ah hian Assam aṭangin chief secretary, additional chief secretary emaw principal secretary (home) an tel dawn a, Meghalaya aṭangin chief secretary leh additional chief secretary an tel bawk ang," a ti. Kar leh lamah Guwahati-ah official meeting hi neih leh a ni dawn bawk a, a hun tur hi July 23 hian an rel nghal ang.

Sangma chuan ramri buaina chinfel chu thil awlsam tak a ni lo tih a sawi a, mahse state pahnihte hian a theih anga chinfel thuai hi an duh ve ve a ni, a ti. State pahnihte hian ramri-a hmun 12-ah buaina an nei mek a ni.