Arunachal damdawi-in pakua e-hospital-ah upgrade dawn - Ravi Shankar

Arunachal Pradesh-a damdawiin pakua chu National Institute of Electronics & Information Technology (NIELIT) bakah E-Hospital puitlinga siam a ni dawn tih Inrinni khan Union Electronics and Information Techno­logy Minister Ravi Shan­kar Prasad chuan a sawi.

Ravi Shankar Prasad chuan ram pumah dam­dawi-in 200 chuang e-hospital-a upgrade an nih dawn thu sawiin, Aru­nachal-ah pawh dam­dawiin pakua chu e-hos­pitalah hian upgrade a nih dawn thu a sawi. Heng hmalakna atana buaipui ngai zawng zawng hi sorkar laipuiin a buaipui dawn tih a sawi bawk.

Hemi kawnga hma lo la hmasa tur hian National Infor­matics Centre (NIC) chu a hriattir nghal a ni.

Shakar Prasad chuan Chief Minister Pema Khandu leh a kaihhruai sorkar chu fakin digitisation lama an hmalakna chu lawmawm a tih thu a sawi a, nitin khawsakna atana Infor­mation Technology pawimawhna te sawiin mi rethei tan pawh a ṭangkai thu a sawi bawk.

Prasad chuan IT chu India's Talent, Information Technology leh India Tomorrow tihna a nih vek thu sawiin Prime Minister Narendra Modi pawhin hmarchhak state-te hma­sawnna tur kawng a ngaih­ pawimawh thu a sawi bawk. Prasad chuan hmar­chhak in hmasawnna a neih loh chuan India in hma a sawn thei lo a ni, a ti.

Prasad chuan state chhunga Common Service Cen­ters (CSCs) kalpui a nih danah erawh a duhthu a sam loh thu a sawi a, gram panchayat level-ah tal CSC chu ṭha taka kalpui turin a ngen a ni.